ინფორმაცია

შავ ზღვაში სატვირთო გემები რეალურად ხდება დრონული და სარაკეტო შეტევის სამიზნე — მხოლოდ 14 ივლისს ერთმა დარტყმამ 5 მეზღვაური იმსხვერპლა და 12 დააშავა. ეს არ არის შორეული საფრთხე, არამედ განმეორებადი რეალობა. სანამ კონტრაქტს მოაწერ ხელს, გადაამოწმე გემის მარშრუტი, დროშა და უსაფრთხოების პირობები.

სანქცირებულ კომპანიებს ხშირად ეზღუდებათ წვდომა საერთაშორისო საბანკო სისტემებზე. ეს ნიშნავს, რომ შენი ხელფასის გადარიცხვა შესაძლოა დაგვიანდეს ან საერთოდ ვერ მოხერხდეს. კომპენსაციის მოთხოვნასაც პრაქტიკულად აზრი არ აქვს, რადგან კომპანიას ან საერთოდ არ აქვს ფული, ან ვერ გადმორიცხავს მას საერთაშორისო სანქციების გამო.

სანქცირებული გემები ხშირად წლების განმავლობაში სათანადოდ არ მოწმდება და მათი ტექნიკური მდგომარეობა კრიტიკულია. ეს საფრთხეს უქმნის შენს სიცოცხლესა და ჯანმრთელობას.

სანქცირებულ გემებზე ხშირად საერთოდ არ არსებობს მოქმედი დაზღვევა. ეს ნიშნავს, რომ თუ დაშავდი, ავად გახდი ან უბედურება შეგემთხვა, სრულიად მარტო რჩები. არავინ იძლევა გარანტიას სამედიცინო დახმარებაზე, ევაკუაციაზე ან რაიმე სახის კომპენსაციაზე.

სანქცირებულმა გემმა შესაძლოა მთელი ეკიპაჟი უცხო ქვეყნის პორტში მიატოვოს. შენ და შენი კოლეგები შესაძლოა აღმოჩნდეთ საკვების, სასმელი წყლის, საწვავისა და სახლში დაბრუნების საშუალების გარეშე, ზოგჯერ თვეების, ზოგჯერ კი წლების განმავლობაშიც კი. ასეთ სიტუაციაში დახმარების მიღება ძალიან რთულია, განსაკუთრებით თუ არ იცი, ვის მიმართო.

პორტის სახელმწიფო კონტროლის სამსახურმა შესაძლოა გემი დააკავოს ან დააყადაღოს, რის შედეგადაც შესაძლოა შენ, როგორც ეკიპაჟის წევრი, ხანგრძლივი დროით გემზე „გამომწყვდეული“ აღმოჩნდე და იმის გარკვევაც რთულია თუ როდის შეძლებ სახლში დაბრუნებას.

სანქციების დარღვევა შესაძლოა შენც შეგეხოს, თუნდაც უბრალო ეკიპაჟის წევრი იყო და პირდაპირ არაფერი გქონდეს საერთო კომპანიის მენეჯმენტთან თუ მისი გადაწყვეტილებებთან. შენი სახელი შესაძლოა მოხვდეს საერთაშორისო ან ეროვნულ „შავ სიებში“, რაც შემდგომში პრაქტიკულად შეუძლებელს გახდის კონკრეტულ ქვეყნებში მოგზაურობას ან იქ პორტში შესვლას. ეს პრობლემა შესაძლოა წლების განმავლობაში გდევდეს თან, თუნდაც შემდეგ სულ სხვა, სრულიად კანონიერ გემზე იმუშაო.

სანქცირებულ გემზე მუშაობის ფაქტმა შესაძლოა მომავალში დასაქმებაზეც იმოქმედოს. მაღალი რეპუტაციის მქონე კომპანიები ხშირად უარს ამბობენ ისეთი მეზღვაურების აყვანაზე, რომელთა სამსახურებრივ ჩანაწერში ამგვარი გამოცდილება ფიგურირებს, მაშინაც კი, თუ პირადად შენ არაფერში ხარ დამნაშავე.